رأى سامح أبو عرايس مؤسس حركة "أبناء مبارك"، أن ظهور فتاة عربية البرجر، ما هو إلا مجرد فيلم لتلميع النظام السياسي القائم- بحسب قوله.
وقال في تدوينه له عبر صفحته الشخصية بموقع التواصل الاجتماعي"فيس بوك": "ياسمين رحيم بتاعة عربية البرجر طلعت ممثلة وعاملة عدة أفلام..يعني مش فتاة مكافحة زي ما الإعلام صورها..دي ممثلة أفلام واعلانات".
وأوضح: "الموضوع كله فيلم كبير اتعمل لتلميع السيسي.. علشان يظهر بصورة الأب الحنون اللي تدخل علشان يساعد بنت مكافحة.. وعلشان في نفس الوقت يروجوا لفكرة إن الشباب ماينتظرش وظيفة في مجاله وينزلوا يبيعوا أي حاجة أو يعملوا عمل حر ".
وأضاف: " افتكرت مشهد في فيلم طباخ الريس لما جابوا للرئيس في الفيلم ( خالد زكي ) فلاح ومراته يقابلوه في زيارة لقرية وبعدين في يوم بيفتح التليفزيون لقى الفلاح ده ومراته بيمثلوا في فيلم وطلعوا ممثلين كومبارس مش فلاح ومراته ولا حاجة".
وتابع: "طيب عايزين تعملوا علينا أفلام وتمثيليات وتجيبوا ممثلة تعملوها بنت غلبانة بتبيع برجر علشان تلمعوا السيسي وتروجوا لأن الشباب مايطلبش وظيفة وينزل يبيع في الشارع .. عايزين تعملوا علينا الأفلام دي اختاروا ناس صح يمثلوا معاكم الدور علشان تبقى محبوكة .. انما تختاروا ممثلة وطلعت في أفلام وحتى في اعلانات .. حركة مفضوحة قوي !!".
