أسرة الخطيب تدعو الصحفيين والحقوقيين والمحامين لحضور جلسة الحكم في العفو الصحي عن أحمد: #خرجوا_الخطيب_يتعالج
قال محمد الخطيب، شقيق السجين أحمد الخطيب، الطالب المصاب بمرض الليشمانيا الحشوية، إنه وردت للأسرة بعض المعلومات تفيد بأن شقيقة صُدر قرار بنقله من مستشفى حميات العباسية وإعادته لسجن وادي النطرون بحجة أنه شُفي من المرض.
وأضاف الخطيب، خلال مداخلة هاتفية في برنامج " بتوقيت مصر"، على قناة "التليفزيون العربي"، أنه لم يستطيع الحصول على أي تقارير تفيد بأن شقيقة قد شُفي من عدوى اللشمانيا الحشوية أو أي مستند يثبت انتهاء بروتوكولات علاجه. وتابع: "ليه بيحصل معانا كده، ليه بيحصل مع أحمد كده، ما هو لو راح السجن دون استكمال علاجه، إحنا اللي هنشيل الليلة".
وقالت فاطمة الخطيب شقيقة أحمد قبل يومين إنه « صدر قرار بنقل أحمد من مستشفي حمايات العباسية للسجن»، وتابعت «كل المؤشرات بتقول إنهم بيدور إزي يقتلوا أحمد بالإهمال الطبي» .
وأشارت فاطمة إلى أن خبر عودة أحمد كان صدمة للأسرة.. وتابعت «أحنا كلمنا ناس هناك عشان يفهموا في ايه قالولنا أن " إبنكم أتعالج خلاص وكان بيتدلع دا كله».
وأضافت فاطمة «نسأل نقول أحمد ليه حيتنقل يقالوا أتعالج طب فين التقارير اللي بتثبت علاجة احنا والله هنفرح لو طلع فعلا اتعالج ومش عايزين اكتر من كدا، فياريت تعرفونا يقولوا ما فيش تقارير طب ليه ما فيش تقارير طالما أتعالج زي ما بتقولوا، مافيش إجابة ولا فيه رد طب الطحال ووزنه والكبد اللي اتدمر من المرض اتعالجوا، آه طب فين التقارير؟ مافيش، طب المرض اتعالج في شهر واحد أو أقل؟ آه.. طب فين التقارير؟ مافيش تقارير.. يبقي عايزين تموتوا أحمد زي كريم ومهند .
وواصلت فاطمة « علمياً أحمد ما ينفعش يرجع السجن تاني خاصة وادي النطرون، لأن ده اللي جالوا فيه المرض وسهل يرجع تاني له ده لو إفترضنا إنه أتعالج يعني لأن جسم أحمد المرض كان أتمكن منه خلاص ودمر المناعة والطحال»
وأكدت فاطمة أن «الداخلية نزلت بيان تهدي الناس بيه، ومنفذتش اللي قالتوا، إنها معندهاش مشكلة تنقل أحمد مستشفي خاصة بس العائلة تقدم طلب ورغم إننا مشينا في كل الطرق وكل الحلول علشان أحمد بس يتعالج وموصلناش لحل ولا نعرف أحمد أتعالج ولا لا ولا نعرف ليه الداخلية رفضه هي والمستشفي تدينا تقارير طالما أتعالج بس كل اللي نعرفه وعن خطوات حصلت وحالات تشبه حالة احمد وماتوا زي كريم مدحت ومهند اللي اتقتلوا بالعمد بالإهمال الطبي».
وحذرت شقيقة أحمد الخطيب من تكرار ما جرى مع مهند وكريم قائلة « مافيش تقارير وحينقلوا أحمد للسجن، رغم إن ده يحصل خطر» وتابعت «كل المؤشرات بتقول إن حالة مهند وكريم ممكن تتكرر تاني بسبب إهمال الداخلية وإستهتارها بحياة البني آدمين كدا» . وتساءلت «ليه مصممين علي قتله زي مهند وكريم»..
ونشرت فاطمة صورة شقيقها بالمستشفى وقالت «دي صورة أحمد ف المستشفى متخيلين حيرجع السجن وهو بالشكل ده حيرجع ينام ع الارض ووسط المساجين، ومناعته مدمره وصحته بالشكل ده طب إحنا عايزين أحمد يعيش يعيش بس مش عايزين نتحسر عليه زي اللي راحوا وماتوا بالإهمال الطبي تضامنوا مع حق أحمد الدستوري بلاش الإنساني طالما حقوق الإنسان هنا بتزعلهم». وواصلت « #خرجوا_الخطيب_يتعالج ».
من ناحية أخرى دعت أسرة أحمد الخطيب الحقوقيين والمحامين والصحفيين لحضور جلسة الحكم في العفو الصحي لـ أحمد يوم الثلاثاء الموافق 16 مايو بمجلس الدولة، وقالت الأسرة في ايفنت جلسة العفو الصحي عن الخطيب، إن الدعوة مفتوحة للجميع لحضور الجلسة، ودعم حق أحمد في الإفراج الصحي.
