انتقد المحامي مالك عدلي، "الفقيه القانوني" صلاح فوزي، على خلفية تأكيده المستمر بأن جزيرتي تيران وصنافير سعوديتين.. مشيرًا إلى أن تصريحاته احتوت على معلومات غير صحيحة على الإطلاق وفيها الكثير من المغالطات.
وكتب عدلي، عبر صفحته على موقع التواصل الاجتماعي "فيس بوك": "صلاح فوزي (الفقيه القانوني) .. دا أكتر حد الصحافة بتنقل عنه ان تيران وصنافير لامؤاخذة سعودية ..والراجل كلامه مغرق الدنيا فقلت يمكن فقيه بجد .. وانا معرفش هوا فقيه فـ إيه .. طبعا احنا لا شفناه في محكمة ولا نعرف أصلا هو بيتكلم عن إيه بس لقيت التحقيق دا منشور على لسانه فقلت برضه نضحك سوا".
وأضاف عدلي "سيادة الفقيه بيقول على عهدة جريدة اليوم السابع إن جزيرة تيران تبعد عن السعودية 800 متر بحري.. آه والله اخترع وحدة قياس مخصوص وسماها (متر بحري) وبيقول إن تيران تبعد عن شرم الشيخ 4500 متر برضه بس محددش بحري ولا جوي".
وتابع "وعنده تصريح خطير بقى بيقول إن الدستور بيثبت تبعية تيران وصنافير للسعودية.. فمعلش يا جماعة هي مادة الدستور اللي بتقول إن تيران وصنافير سعودية دي رقمها كام ؟؟ وطبعا هو شايف إن نقل تبعية تيران وصنافير لدولة أخرى مجرد ترسيم حدود مش تنازل عن أرض ولا حاجة وزي ما كلنا عارفين ان تيران وصنافير دي مش جزر ومش جزء من الإقليم البري وإنما هما مجرد نوعين من الطيور النادرة .. #تيران_وصنافير_مصرية".
وفي تدوينة أخرى، انتقد مالك عدلي جريدة اليوم السابع، حيث قال إنها "وصلت لنتيجة خطيرة ومنتهى النباهة والذكاء وكانت غايبة عن الجميع.. قال لك أطلس مصر الصادر 1928 لون الجزيرتين بلون السعودية علما بإن السعودية تأسست سنة 1932.. يعني بعد صدور الأطلس بأربع سنين.. ونحب نسأل بقي هو لون السعودية وقتها كان إيه؟؟ ..وطبعا جيولوجيا هما حللوا الحجارة بتاعة الجزيرتين اللي ف نص خليج العقبة فطلعت جزء من الكتلة السعودية وحضراتكم عارفين طبعا ان الكتلة السعودية دي بيميزها الوحمة اللي ف دراعها اليمين واللي لقيوا زيها ف حجارة الجزيرة .. وال160 خريطة دول بقي نتيجة ان هما صوروا الخمس خرايط الرسميين اللي بيقولوا ان تيران وصنافير مصرية كل واحدة 32 صورة فبقي فيه 160 خريطة ومن كتر الحبر بقت سعودية..بسم الله ما شاء عليك نبيه ..تكبير".