رصدت "الدستور" مجموعة من المواقف التي علقت فى أذهان الكثيرين عن مواقف حدثت مع المسحراتي، تقول "أمانى محمد": "المسحراتي دة فاكهة رمضان فعلا، بحس بفرحة كبيرة لما بينادى على اسمى، على فكرة أنا عندى 33 سنة بس بخليه ينادى اسمي مع أولادى، وفي مرة عمرى ما هنساها لما نادى عليَّ وقال يا أم أحمد، جوزى افتكر راجل غريب بينادى عليا الساعة 2 بالليل، وقعد يزعق لحد ما الآذان أذن".
بينما قالت أمينة محمود: "أنا حصلى موقف سخيف مع المسحراتي عمرى ما هنساه، مرة بقوله نادى على اسمي من البلكونة، راح قالى لا انتى من السنة اللى فاتت مدتنيش فلوس، المشكلة أن الكراش كان واقف فى البلكونة قدامى، ضيع مستقبلى الله يسمحه"، وقال عبدالله أحمد: "مرة كنت رميت مياه على المسحراتي، تانى يوم جه نادى على اسمى وأسماء أصحابي وفضحنا فى المنطقة والحمدالله أخدت علقة حلوة".
وقالت أميرة محمود: "إحنا بقى كان عندنا مسحراتية مش مسحراتي، كانت عسولة الصراحة، وكانت لما تعدى تنادى على الناس الرجالة بتوع المنطقة كلهم، وهما اللى يبصوا عليها، ونسمع بقى صوت خناقة بين راجل ومراته".