البشرة في رمضان بتتعرض للجفاف اكتر من أي وقت تانى بسبب ساعات العطش الطويلة وقلة شرب السوايل، غير حر الصيف، ولو مخططة ان فرحك يكون بعد رمضان، فطبعا مينفعش بشرتك تكون مجهدة، علشان كده استغلي رمضان واعملي الماسك اللي لهلوبة هتقولك عليه هيريح بشرتك، ويخليكي مشرقة قبل الفرح.
والمكونات الأساسية للماسك هي السكر وزيت جوز الهند، وبنضيف عليهم مكون تاني حسب الحاجة اللي عايزاها من الماسك، ترطيب او تقشير:
الجريب فروت: عصير الجريب فروت على الماسك بيبقى منشط للبشرة وبيجدد خلاياها وينضفها، وبيحميها من اشعة الشمس ويقلل الدهون والزيوت.
اللافندر: بيريح البشرة المجهدة وبيعالج الالتهابات والجروح.
النعناع: بيحمي البشرة من البكتيريا والتلوث وبينضفها ويقشر الجلد الميت.
مكونات الماسك:
2 كوب سكر + كوب زيت جوزهند + أي واحد من المكونات اللي فوق حسب الرغبة.
الطريقة:
بنخلط المكونات كلها مع بعض ونخزنها في برطمان نقدر نستخدمه لفترة طويلة.
ولو عايزة تاخدي كل الفوايد من الماسك بمكوناته المختلفة، اعملي خليط السكر وزيت جوزالهند وخزنيهم ووقت الاستخدام ضيفي المكون التالت على الكمية اللي هتستخدميها بس.