التفاهم بيلعب دور كبير جدا في العلاقات، واي اتنين نفسهم يكملوا سوا طول العمر، لازم تكون بينهم لغة حوار مشتركة، زي ما بنشوف ان في ناس بيفهموا بعض من مجرد نظرة العين، وفي علامات تقدري من خلالها تعرفي التواصل بينك وبين شريكك مستواه عامل ازاي، واللي هي:
1- بتسمعوا لبعض كويس:
مفيش علاقة فيها تفاهم بدون لغه حوار، علشان كده لازم تعرفوا تسمعوا بعض، وتتناقشوا من غير ما حد يقطع على كلام التاني و سيبوا مساحة لكل طرف يعبر فيها عن وجهة نظره.
2- بتحترموا مشاعر بعض:
مفيش حد فيكم هيبقى مع شريكه طول الوقت، لكن على الرغم من كده كل واحد فيكم لازم يراعي التاني في تصرفاته، ويحترم مشاعره في غيابه زي حضوره بالظبط.
3- فاهمين هزار بعض:
اوقات كتير الهزار بيعمل مشاكل بسبب سوء التفاهم اللي بينتج عنه، زي ان طرف يكون بيهزر والطرف التاني واخد الكلام جد، علشان كده لازم تكونوا متفقين على اطار عام للهزار تراعوا فيه اى حاجة تضايق الطرف اللي قدامكم، لان في حاجات ممكن حد يحسبها عادية ومفيهاش مشكلة، تبقى بالنسبة للطرف التاني مشكلة كبيرة وبتضايق.
4- مفيش حاجة بتخبوها:
مش شرط ابداً لما نقول مفيش حاجه بتخبوها، انكم تبقوا عارفين ادق التفاصيل عن حياة بعض بشكل فعلي، لكن نقصد ان مفيش حاجات بتخبوها بشكل متعمد، او يكون في سور بينكم يخلي في حساسية في الكلام.
5- بلاش تفاصيل الماضي تدخل الحاضر:
لما تحصل بينكم مشكلة، بلاش نقعد نفتكر اي مواقف قديمة سلبية للطرف اللي قدامنا، ونفتح مواضيع فرعية بعيدة عن المشكلة الرئيسية، لان ده هيعمق المشاكل بينكم مش هيحلها.