ستات كتير بيعانوا من مشكلة تساقط شعرهم في رمضان، لان الصيام لساعات طويلة مع ارتفاع درجة الحرارة، بيخلي الجسم يفقد السوايل وعناصر غذائية كتيرة، بجانب اتباع عادات غذائية غلط، ولو كنتي بتعاني من المشكلة دي، لهلوبة هتقولك على مجموعة نصايح علشان تتجنبيها:
1- دلكي فروة راسك مرتين في اليوم باستخدام أطراف صوابعك، علشان تنشطي الدورة الدموية في الرأس وتقوي بصيلات الشعر، وبالتالي تمنع تساقطه.
2- ابعدي عن التعرض لأشعة الشمس الضارة في وقت الذروة فترة طويلة، لانها ممكن تتلف الطبقة الخارجية للشعر وبالتالي تسهل تساقطه.
3- اشربي عصاير طبيعية غنية بفيتامين "ج" زي البرتقال والجزر، لانهم بيعالجوا مشكلة تساقط الشعر.
4- بلاش تشدي شعرك جامد وانتي بتمشطيه، ولا تعملي تسريحات صعبة، لان كل ده بيقصف الشعر وبيسبب تساقطه.
5- لو انتي محجبة نشفي شعرك كويس قبل ما تلبسي الطرحة، حتى لو اضطرتي تستخدمي سيشوار، لانه لو فضل مبلول تحت الطرحة، بصيلات الشعر هتضعف وده هيسهل تساقطه.
6- استخدمي فرشة أو مشط اسنانه واسعة وانتي بتسرحي شعرك، علشان تمنعي تقصف الشعر وتساقطه.
7- يفضل تاكلي مكسرات زي اللوز والكاجو لان فيهم أحماض أوميجا 3 اللي بتقوي بصيلات الشعر وبتمنع تساقطها.
8-اشربي كمية ميه كبيرة من الفطار لحد السحور، علشان تحافظي على رطوبة جسمك وشعرك، وتغذية الشعر من جذوره ومنع تساقطه.