رد الفنان محمد رمضان، على الاتهامات الموجهة له بنشر العنف والبلطجة في الشارع المصري، قائلًا: «الناس اللي بتقول عليّا كده دول حاقدين لأنهم بيركزوا على جانب واحد من أعمالي ويتجاهلوا الباقي».
وأضاف رمضان، خلال حوار ببرنامج «بتوقيت مصر»، عبر قناة «BBC عربي»، مع الإعلامية نوران سلام، أن منتقديه ينظرون فقط على الجانب السلبي لأعماله، متسائلًا: «طب الناس دي ليه مش بتبص لفيلم واحد صعيدي، ولا فيلم شد أجزاء، أو مسرحية رئيس جمهورية نفسي؟، ما كل الأعمال دي بعيدة تمامًا عن العنف والبلطجة».
تابع: «إحنا عندنا مقولة في مصر بتقول حبيبك يبلعلك الزلط وعدوك يتمنالك الغلط وهو ده اللي بيحصل معايا، عبد الحليم حافظ وأم كلثوم كان ليهم أغاني فيها غزل صريح هل ينفع أقول عبد الحليم وأم كلثوم أغانيهم مش حلوة؟ عبد الحليم قال (قدُك المياس) و(قدُك) في اللغة العربية معناها مكان حساس في جسم الست»، واصفًا أحباءه بـ«البنزين اللي بيمشي العربية»، فيما شبه أعداءه بـ«زيت السيارة اللي لازم يتحرق».
جدير بالذكر أن رمضان حقق نجاحًا كبيرًا من خلال مسلسله «الأسطورة»، الذي عُرض في شهر رمضان الماضي.
