دراسة جديدة اتعملت على مجموعة من الستات اللي اتجوزوا جديد، واكدت ان 80% منهم بيستمتعوا بغياب الزوج وقت العمل، وعلى الرغم من انه المدة قليلة وبيعملوها فيها حاجات تعتبر عادية، الا انها بتفرق معاهم جدا، علشان كده لو لقيتي نفسك بتتبسطي لما جوزك يخرج انتي طبيعية جدا، ومش معناها انك مش بتحبيه لكن اعتبريها كأنك بتجددي طاقة حبك ليه وبتستريحي، وده لان اغلب الستات بيقضوا وقتهم في:
1- النوم:
فترة تواجد زوجك في البيت ولو كمان في عندكم اطفال، اكيد ده سبب كافي جدا ان يبقى صعب عليكي تنامي، علشان كده اول ما هو ينزل بتحسي انها فرصة دهبية انك تنامي ساعتين من غير ما تفضلي صاحية لأي سبب.
2- الاستمتاع بالتلفزيون:
لان في كتير من الاوقات انتي وزوجك بتفضلوا تتفرجوا على حاجات مختلفة عن بعض، زي انه يحب يتفرج على ماتشات الكورة والاخبار السياسية، في حين ان انتي ممكن تفضلي المسلسلات او برامج الطبخ، فطبعا عدم وجوده بيجعلك تتفرجي على اللي انتي عايزاه براحتك وباستمتاع.
3- لمة الاصحاب:
طبعاً بتعزميهم لو موجود واكيد عارفهم، لكن لو حابين تقعدوا براحتكم فعلا وتتكلموا في حكاوي البنات من غير ما تلاقي حد بيسخر من كلامكم سوا، فوقت شغل جوزك هو الانسب على الاطلاق.
4- تكلمي ماما:
طبيعي جدا تكلميها وهو موجود وكل حاجة، بس طبعا في عدم وجوده بتكلميها بحرية اكبر وممكن تحكيلها حاجات كتير مش هتقوليها وهو موجود وممكن يكون سامعك، تجنبا لأي تعليق مش حلو، وعلشان تبعدي عن وقوع اي مشكلة.