الامهات اكتر اشخاص بيتعبوا خلال اليوم، لانها بتشتغل وتنضف وتروق وتطبخ وتغسل وتذاكر للولاد وتقعد معاهم وتوديهم التمرين وتاخد بالها من جوزها وتهتم بمظهرها واناقتها، ولو انتي ام اكيد بعد يوم صعب وطويل بتكوني محتاجة للاسترخاء، ولهلوبة بتقترح انك تعملي ده بالاستعانة بالزيوت العطرية، وهتقولك افضلهم.
1- علشان تحصلي على نوم جيد بعد يوم طويل ومتعب على جسمك، وعايزة تتخلصي من التوتر والقلق، ادهني جسمك بزيت اللافندر، فهو من الزيوت المهدئة للجسم.
2- بعض الزيوت العطرية زي الليمون و النعناع وضعها على الجسم بيساعد على الاسترخاء وتحسين وظيفة الجهاز المناعي، وتقليل فرص حصولك على المرض.
3- لما بتكوني مجهدة ومشغولة خلال اليوم رقبتك بيكون فيها ألم وبتحسي ان عضلاتك مشدودة، اخلطي قطرتين من زيت النعناع مع قطرتين من زيت اللافندر، وممكن جوزك او اي ست تعملك بيهم مساج لجسمك، هيفك العضلات ويخلصك من اي ألم، وكمان بيساعد على الاسترخاء.
4- الامومة مسؤولية كبيرة، واكيد بتتعرضي للتعب والاجهاد خلال اليوم وجسمك بيحتاج لطاقة علشان تقدري تبدأي بيها يوم جديد، وافضل حل ليكي هو وضع قطرت من اي زيت عطري تفضليه على معصمك وخلف اذنك، لما تحسي انك متوترة او مجهدة، ده هيعمل على تهدئتك والاحساس بالاسترخاء.