كل الامهات بيسعوا انهم يربوا اطفالهم تربية صحيحة ويطلعوا صالحين في المستقبل، ومن ضمن السلوكيات اللي بيحاولوا يعلموها ليهم هو ان الطفل لما يغلط يعتذر، ويحاول يتجنب تكرار الغلطة، لكن الام هي كمان لازم لو غلطت في حق اطفالها تعتذرلهم، لانهم في الاخر بيقلدوها وبيتأثروا بسلوكها بشكل كبير، كمان هيتعلموا ان الاعتذار قوة مش ضعف، ولهلوبة هتقولك اهمية انك تتأسفي لاطفالك ومدى تأثير كلمة "أنا أسفة" عليهم.
1- الاعتذاراهتمام:
احيانًا ممكن تكوني منزعجة من دوشة الاطفال حواليكي ومشاكلهم المستمرة مع بعض، وسط ضغوط اليوم غير المنتهية، فبتضطري تطلعي عصبيتك عليهم، لو حصل ده يبقى لازم تتأسفي منهم، اعتذارك ليهم في الحالة دي، بيأكدلهم قد ايه انتي مهتمة بمشاعرهم وبتحافظي عليها.
2- يعتبر نموذج للسلوك الجيد:
الاعتراف بالغلط ممكن يكون صعب، لان احيانًا الشخص المخطئ بيحس ان لما يعتذر كده بيجي على كرامته، لكن بالعكس لما تقولي لاطفالك انا اسفة ده بيدل على قوة شخصيتك وحسن سلوكك اللي بينعكس عليهم وبيتأثروا بيه، وده افضل مثال تعلميهم بيه كيفية ضبط النفس.
3- الاعتذار مش معناه الاستسلام:
مش معنى انك غلطتي في حق طفلك تفضلي طول الوقت تكلميه بنغمة اعتذارية وتتأسفيله كل شوية، لكن اتعاملي مع الموقف بهدوء وحكمة، اعترفي بيه واعتذريله وحاولي تتجنبي عدم تكراره مرة تانية، ولازم تبقي عارفة انك لما تتعذري ده مش معناه انك شخصية مستلمة بالعكس ده بيعرف طفلك قد ايه انتي قوية.
4- الاعتذار بيعزز من الاحترام المتبادل:
كلنا عايزين اطفالنا يكونوا مهذبين ومحترمين، والاحترام قايم على مبدأ الاخد والعطاء، بمعنى انك زي ما انتي بتبقي عايزة طفلك لما يغلط يعتذر، لما يشوفك انتي كمان بتتأسفي لو غلطتي في حقه، اعترافك بخطأك هيزود من احترامه ليكي، وهيقلدك وبالتالي وقتها انتي هتحترميه اكتر، وتكون علاقتكم اساسها المودة والاحترام.
5- الاحساس انك افضل:
اكيد الامومة مسؤولية كبيرة وصعبة، ممكن بدون قصد ترتكبي غلطات كتيرة في حق ابنك، واعترافك بيها واعتذارك عنها محاولتك تتعلمي منها، ده يجبرك تركزي على تربية اطفالك والتطوير من نفسك ومنهم، وبالتالي تحسي بشعور افضل.