الشغل مكان بتحاول طول الوقت تثبت فيه كفاءتك، علشان كده في تصرفات وجمل اوعى تستخدمها في مكان العمل، منها:
- مش مشكلتي:
فاكر لما كتبت في سيرتك الذاتية انك تقدر تشتغل في مجموعة؟ الجملة دي بتضرب اللي كتبته، لازم لما حد يطلب منك التعاون في الشغل تحاول تعمل ده على قد مسئولياتك وإمكانياتك.
- احنا طول عمرنا ينشتغل كده:
الجملة دي بتدي انطباع انك بتخاف من التجديد والتغيير ومش مرن كفاية لاستيعاب تغيير الظروف وده بيقلل من النظرة ليك ولكفاءتك في الشغل، لكن لو مش عاجبك الاقتراح في طريقة أحسن تطلب بيها تفسير زي إنك تقول "ممكن اعرف الجديد ده هيفيدنا إزاي؟".
- أنا مش هقدر أعمل أكتر من كده:
لو أنت فعلا مش قادر تدي المكان ولا الشغل أكتر من كده، ايه اللي مخليك تستمر فيه، الجملة دي لا يجوز انك تقولها حتى لو هي حقيقية، دايما قول أنا أقدر أحاول أو إنك تطلب مساعدة حد وده مش عيب ولا غلط.
- دقيقة وأخلص كل حاجة:
المواعيد الوهمية اللي بنديها لأصحابنا في المقابلات لازم نبعدها عن التزامات الشغل، ولو عايز تدي احساس انك بتعرف تنجز وتخلص بسرعة قول انك هتخلص في أسرع وقت ممكن لكن بلاش تقول كلام خرافي.
- ده كلام فاضي:
اوعى في الشغل تقلل من رأي حد علشان مش مقتنع به حتى لو كان تحتيك، لازم تحاول توصل لوجهة نظره ولو لسه مش مقتنع يبقى عبر عن رفضك الفكرة بطريقة أشيك من كده.
- أنت غلطان:
حاول تتجنب بكل الطرق انك تقول لحد في وشه إنه غلطان، ذوقيًا يفضل توضح وجهة النظر الصح وتبررها لأن الاقناع مهم.
- أنا متهيألي:
مفيش حاجة اسمها كده في الشغل، يا إما نجمع المعلومات ونكون وجهة نظر أكيدة أو نطلب التوضيح، لكن الآراء المبنية على تهيؤات دي مرفوضة.
- أنا عملت اللي عليا:
طول الوقت في الشغل بنحاول نثبت اننا أحسن، علشان كده بلاش تقول أنا عملت اللي عليا أو اللي اقدر عليه، الأحسن تقول هحاول أحسن من نفسي أو انتاجي المرة الجاية.
- كل اللي عملته ده غلط:
لما حد من الموظفين تحت ادارتك يغلط اوعى تقوله أنت كل اللي بتعمله غلط، الاحسن تقوله ده مش المتوقع والمرة الجاية حاول تبقى أحسن، النقد البناء مفيد أكتر من التأنيب.
- يمكن أكون غلطان، بس.. :
لو عندك فكرة اوعى تقدمها في إطار غلط من الأول، ده بيسوق بالسلب ليها حتى لو كانت حلوة، الأحسن تقول أنا عندي فكرة وتدخل في الموضوع على طول.
- مفيش وقت:
الموضوع مش بس موضوع وقت، هو موضوع اولويات كمان، لو أنت عارف إن عندك شغل وميعاد تسليم واتاخرت فيه وكان متأخر في واولوياتك يبقى المشكلة عندك مش في الشغل، ولازم تحاول تعرف المسئولين انك هتتأخر في التسليم، لان شغلك ده غالبا مترتب عليه مهام تانية.