الراجل طفل كبير، في قاعدة بتقول كده وده معناه ان مش كل الرجالة بتتمتع بالنضج الكافي لانها تعبر عن مشاعرها بطريقة صريحة ورومانسية، في منهم بياخد الموضوع بشكل طفولي نوعًا ما وهو انه يضايق حبيبته او ينافسها على حاجة او يغيظها، وعلشان تعرفي الفرق بين التصرفات اللي في ظاهرها تضايق وفي باطنها تحمل مشاعر طيبة، واللي الغرض منها المضايقة بس، لهلوبة هتقولك ازاي بيعاندك بدافع الحب.
- بينافسك:
لو لاحظتي انه بينافسك انتي تحديدا اكتر من اي حد تاني في مين هيخلص شغله الأول او مين هيقول حاجة تضحك اكتر من التاني ده معناه انه معجب بكي، والمنافسة دي وسيلة لانه يلفت نظرك لان التنافس عند الرجالة شيء بيسعدهم ويحمسهم، لكن لازم تنتبهي ان التنافس ممنوع يخرج عن اطار الذوق والاحترام.
- بيسخر منك:
السخرية أنواع في منها مقبول وبخفة دم وفي منها بوقاحة، النوع التاني أكيد مرفوض لكن الاول ممكن يبقى الدافع له الاعجاب وبيبقى وسيلة طفولية بيعتمد عليها رجالة كتير في اظهار اعجابهم واحيانًا غيرتهم لو سخر من اعجابك بممثل أو انتباهك المتركز على حاجة غيره.
- المعارضة:
لو عارفة عنه انه بيحب حاجة معينة وفي نفس الوقت بينكر ده قدامك ويعارضك في حبك ليها ده معناه حاجة واحدة، انه في مود للهزار والمعاكسة وبيحب يشوفك متحمسة لرأيك وبتدخلي في نقاشات حماسية.
- بيهتم بالتفاصيل:
لو بيعلق على طريقة لعبك في شعرك وانتي زهقانة او تأففك وانتي متضايقة ده معناه انه شايف تفاصيلك ومهتم بيكي ولو انتي معجبة به دي علامة كويسة انه كمان مركز معاكي.
- بيخترعلك اسماء دلع:
خصوصًا لو تكسف او تغيظ ، ده معناه انه بيحب يهزر معاكي ويستفزك بشكل ودي، اما لو الموضوع خرج عن اطار اللياقة يبقى هو شخص مش مناسب.
- بيتهمك:
الاتهام بانك معجبة بشخص تاني أو مهتمة بشخص تاني غالبًا بيبقى بغرض معرفة حالتك الاجتماعية لانه عايز يعرف له مكان في حياتك ولا لأ، لو لقيتيه بيتهمك بالاهتمام بغيره اعرفي انه غيران ومهتم يعرف لو كنتي متقبلاه ولا حياتك مشغولة بحد تاني.