في ظل ماتشهده البلاد من ارتفاع في الأسعار، تبقى بعض الأمور بعيدة عن هذا الصراع ولا تتأثر بضريبة القيمة المضافة أو سعر الدولار وغيرها.
ومن هذه الأمور: العلاقات الجتماعية، الابتسامة و"الألش" كما ذكرت صفحة "5 بلس حاجات".
وجاء عبر الصفحة بموقع التواصل الاجتماعي "فيس بوك": "طبعًا حضراتكم سمعتم إن أسعار كل حاجة هتغلى أكتر ما هي غالية، فإحنا هنا بنقولكم وداعًا لغلاء الأسعار وجشع التجار وعملنا لكم خمسة بلس حاجات مش هتغلى مع الزيادة القادمة للأسعار:
الإنسان المصري هيفضل رخيص ومش هيغلى والأدلة كتير وكلكم عارفينها
الضحك عمره ما هيغلى فبلاش تضيع حياتك من غير ما تضحك. كتير ومن قلبك ، النكد موجود وهيفضل موجود إضحك ده محدش واخد منها حاجة.
الألش للأسف مش هيغلى وهنفضل نقابل ناس بتألش ألش سخيف.
إحترام الآخرين حتى لو أقل منك في المستوى المادي والإجتماعي هتفرق معاهم نفسيًا جدًا وسط القرف اللي هما فيه.
الابتسامة كمان برخص التراب فلو سمحت بعد إذنك ابتسم في وش أخوك أو أختك مش هتبقى أنت والأسعار عليهم.
المحبة لسه على وضعها ومغليتش فخليك طاقة حب متحركة ، وانشر الحب بين الناس ، بلاش تكره حد.
الكلمة الطيبة بتدوب الجبال وبتريح قلوب كتير وببلاش.
سؤالك عن أصحابك وحبايبك هيكلفك شوية وقت صغيرين.. إنما مش هيكلفك فلوس وكمان معفي من الضرائب
المحبة والمعاملة الطيبة هي اللي بتدوم وبتهون على الناس أي حاجة وحشة.
طبعًا المواصلات أسعارها بقت عظيمة لكن لسه المشي ببلاش وكمان بيخلي صحتك كويسة وبيساعدك لو بتعمل دايت.
قعدتك مع أهلك في البيت من أحلى الحاجات اللي في الدنيا ومش هتكلفك حاجة.