شن المحامي والحقوقي "جمال عيد هجومًا شرسًا على الدكتور رفعت السعيد - رئيس حزب التجمع - على خلفية مقاله الذي نُشر بإحدى الصحف القومية أمس الذي انتقد عدد من المعتقلين في السجون . وقال "عيد" في تدوينة عبر حسابه بـ"فيس بوك": "حظي السيء ، جعلني أقرأ اليوم مقال أشبه بالتقيؤ للسيد رفعت السعيد" حسب تعبيره .
وأضاف: "رفعت السعيد بيلقح على أحمد دومة وعلى آيه حجازي ويهاجم اللي بيتكلم عن الاختفاء القسري، وطبعا، ختم بهجوم يشبه تاريخه على المدافعين عن حقوق الانسان، وبيسأل هما بتوع حقوق الانسان بيشتغلوا ايه؟ وبيكسبوا منين؟ وحقوق الانسان مفروض تكون تطوعية".
واستدرك: "طيب يا رفعت : احنا اشجع منك وبنقول اسمك،آيه حجازي وأحمد دومة خدموا للبلد دي أكتر من خدمتك لمبارك وللثورة المضادة.. بتوع حقوق الانسان أغلبهم محامين وباحثين وتقنيين، بيعيشوا من مرتباتهم.. حضرتك رئيس حزب سياسي من السبعينات، والسياسة مش مجال تربح، قولنا أنت بتشتغل ايه؟ وبتعيش منين كل السنين دي؟ يعني بتاكل منين؟ .. يا راجل عيب عليك، أنت فاكر الاهرام اللي انت هاجمت ولقحت وغمزت ولمزت في صفحاتها، كتبت عنك ايه من كام سنة؟ .. طيب أنت شفت عبدالحميد كمال نائب السويس التجمعي قال ايه سببا استقالته من التجمع؟ كلام وحش جدا في حقك" حسب تعبيره.
وأنهى كلامه قائلًا: "التجمع، هذا الحزب اللي كل يساريي مصر كانوا يأملون فيه خير، أنت عارف وصل على ايدك لفين؟ ألا تخجل، على فكرة انت بتفكرني بمكرم محمد أحمد ومصطفي بكري بس" حسب قوله.